महाराणी जिजाबाई संभाजीराजे भोसले

 

महाराणी जिजाबाई संभाजीराजे भोसले

पोस्तसांभार ::चेतन दादा ( इतिहास अभ्यासक मंडळ )

जीवन :

करवीर राज्याचे दुसरे छत्रपती आणि राजसबाई ह्यांची सून महाराणी जिजाबाई होय. महाराणी जिजाबाई ह्या तोगलकर शिंद्यांच्या घराण्यातील नरसोजीराव शिंदे यांच्या कन्या होत्या. छत्रपती संभाजी महाराज ह्यांना एकूण ८ पत्नी

१) आनंदीबाई

२) उमाबाई

३) अर्कवृक्ष

४) जिजाबाई

५) सुंदराबाई

६) सकवारबाई

७) दुर्गाबाई

८) कुसाबई

महाराणी जिजाबाई ह्यांचा विवाह इ.स. १७२६ रोजी झाला. त्यांचा लग्नासाठी अंदाजे ३ लाख रुपये खर्च आला.

राज्यकारभार :

महाराणी जिजाबाई ह्यांनी प्रत्यक्ष कारभारात १७५०-५१(छत्रपती संभाजी महाराज ह्यांचा मृत्यूच्या किमान १० वर्ष आधी) पासून घातला असावा कारण अनेक पत्र त्यांचा नावाने लिहली गेलेली आहेत. छत्रपती संभाजी महाराज ह्यांचा मृत्यूनंतर (२० डिसेंबर १७६०) राज्यावर अनेक संकट आली पण महाराणी जिजाबाई न डगमगता आपल्या बुद्धी चातुर्याने सामोरे गेल्या. १७६१-१७७३ हा बारा वर्षांचा कार्यकाळ महाराणी जिजाबाई ह्यांचा राज्यकारभाराचा कार्यकाळ होय.

राजकारण :

छत्रपती संभाजीराजे ह्यांना पुत्र नव्हते. त्यांच्या मृत्युनंतर नानासाहेब पेशव्यांनी "महादजी भोसले-मुंगीकर यांचा धाकटा भाई उमाजी त्यास बरोबर द्यावा आणि तेथे जाऊन त्यास राजा करावा. कारभार जिजाबाईंनी करावा." असे पत्र जिजाबाईंना पाठवले. असा बेत आखला पण महाराणी जिजाबाई ह्यांना हा बेत मान्य नव्हता. त्यामुळे नानासाहेब पेशव्यांनी विसाजी नारायण, सदाशिव अवधूत आणि महादजी भोसले ह्यांना फौजेसह रवाना केले. महाराणी पेशव्यांबरोबर वाटाघाटी करायचे प्रयत्न करत असताना युद्धाची देखील तयारी करत होते. अचानक एक दिवशी महाराणी जिजाबाईंच्या फौजेने हल्ला करून नानासाहेब पेशव्यांचा पराभव केला. महाराणी जिजाबाईंच्या मुत्सद्देगिरीची आणि पराक्रमाची कल्पना या प्रसंगाने सर्वानाच आणून दिली.

२३ जून १७६१ रोजी नानासाहेब पेशव्यांचा मृत्यू झाला आणि माधवराव पेशवे गादीवर बसले.

शरीफजीच्या वंशातील शाहजीराजे भोसले (खानवटकर) इंदापूर परगण्यात राहत होते. त्यांचा मुलगा माणकोजी यास दत्तक घ्यावा अशी छत्रपती संभाजीराजेंची मृत्यूपूर्वी इच्छा होती. हीच इच्छा आदेश मानून मानकोजींना कोल्हापूर गादीवर बसवले आणि त्यांचं नामकरण शिवाजी असे केले. माधवराव पेशव्यांनी सुद्धा या निर्णयाला पाठिंबा दिला. अशा प्रकारे महाराणी जिजाबाई ह्यांनी एक मोठा वारसाहक्काचा

तिढा सोडवला.

दूरदृष्टी :

इंग्रजांचे समराज्य आणि सामर्थ्य मध्ये सुद्धा ह्या काळात वाढ होऊ लागली आणि त्यांचा उपद्रव मराठ्यांचा सत्तेला होऊ लागला. हे परकीय सामर्थ्य वेळीच नष्ट नाही केले तर त्याचे परिणाम वाईट होतील अशी कल्पना त्यांना आधीच आली होती. सावंतवाडीच्या दिवनाला १२ मार्च १७६५ रोजी लिहिलेल्या पत्रात असे म्हटले आहे की "कोवळा मोड आहे तो मोडिल्याने उत्तम. भारी जाहलेने सर्वांचे वाईट". ह्यावरून त्यांची दूरदृष्टी स्पष्ट होते.

इतिहास संशोधक :

कोल्हापूर इतिहासाच्या संदर्भात असे म्हणता येईल की, हे राज्य महाराणी ताराऊसाहेब ह्यांनी स्थापन केला तर महाराणी जिजाबाई ह्यांनी त्याचे संरक्षण केले. दोन्ही महाराणी मध्ये एक गोष्ट साम्य देखील आहे की दोन्ही महाराणी प्रत्यक्ष युद्धात तलवार घेऊन भाग घेतला आहे. दोन्ही महाराणींच्या कर्तबगारीला विशेष महत्व आहे. युद्धात अनेक जय आणि पराजय आले पण त्यांनी राज्य रक्षिले हे विशेष.

रियासतकार गो.स.सरदेसाई असे म्हटले आहे की, " जिजाबाई मोठी धोरणी होती. आपले व प्रतिपक्षाचे बलाबल ओळखून आणि प्रसंग पडेल त्याप्रमाणे वागून आपलाच हेका न चालिवता प्रसंगी पडते घेऊन ती आपले कार्य साधीत असे"

वासुदेवशास्त्री खरे असे म्हणतात, "जिजबाईंची हिंमत, मसलतीचे धोरण, मनाची दृढता व कुलाभिमान हे गुण वर्णनीय होते"

मुद्रा :

महाराणी जिजाबाई ह्यांचा स्वतःचा शिक्का पुढीलप्रमाणे : "शंभु राजस्य भार्यायां जिजादेव्यां धरातले बालेंदुरिव वर्धिष्णू मुद्राभद्राय विराजते"

अशा महान महाराणी जिजाबाई ह्यांचा १७ फेब्रुवारी १७७३ रोजी निधन झालं. त्यांचा पुण्यतिथी निमित्ताने विनम्र अभिवादन

संदर्भ ग्रंथ सूची :

१) पेशवे दप्तर : २५-२६

२) करवीर रियासताची कागदपत्रे : खंड १

३) करवीर सरदारांच्या कैफियत : ५८

४) करवीर रियास्त

#itihasavar_bolu_kahi #इतिहासावर_बोलू_काही #ताराराणी #भद्रकाली #ताराऊसाहेब #TaraRani #ChhatrapatiShivajiMaharaj #ChhatrapatiSambhajiMaharaj #ChhatrapatiTararani #ChhatrapatiRajaramMaharaj #शिवराय #छत्रपतीसंभाजीमहाराज #छत्रपतीशिवजीमहाराज #छत्रपतीराजाराममहाराज #छत्रपतीताराराणी #इतिहास #करवीर #करवीर_रियासत #महाराणी #जिजाबाई_संभाजी_भोसले #jijabai_sambhaji_bhosale